21. 6. 2019: Юрко ХАРИТУН: Гуслї з явора, Як тя найти? Як родить ся поезія, Розшкірены пера, Лечу і я, У віршиках фраїркы  (Стихы)

Гуслї з явора
Через облачік
з моёй тринадцятой
было видно
як вітор з явора на дворї
гуселькы робив
Не скриплять
Затих
Мене пальцї не болять
Заграю я на них

Як тя найти?
Іщі лїто не одлїтать
Клёпкать на дверї
На столї обрус білый
На нім квіткы сімокраскы
дуговы мотылї
Чекам коли отвориш ты
Якыйсь непокій на душі
Мелодія схована у траві
а ты десь сама у вырї
Як тя найти?
Хочу і я выкупати ся
Выкупити ся з грїхів

Як родить ся поезія
Потемря
Тма
Часом страшна
Але коли лампа на стїну
малює контуры твого тїла
і зачнеш блюзочку знимати...
Рукы мої гнїзда
про твої пташенята
Родить ся поезія

Розшкірены пера
Час біжыть
В грудях писклявы звукы орлїв
                              звукы копыт
Час летїв
Голос затих
як крыла голубів
Правда така
на столї затихли
го розшкірены пера

Лечу і я
Як пергач
Вішала ся на мене
Одышла
Де найти її яскыню?
Моя осїнь іщі не пришла
і добрї памятам дорогу
Лем на нїй теперь
розгорїло ся листя
Як пергач лечу і я
Не маю страх із огня

У віршиках фраїркы

Фраїркы
на пальцях пораховати можу
Лем не знаю
кілько менї треба рук
Бо думкы
выґумовати не зможу
А жыти без них
Вісїти як на нитцї павук
довго не докажу
Фраїркы мої
до віршиків вложу

(З приправлёваной книжкы Моя тринадцята.)